您的位置:首页 > 资料 > 哥哥访谈 > 正文

永远怀念哥哥

日期:2008-03-21 来源:《犬月刊 》(5/2003) 作者:admin 浏览: 字号:TT

二零零三年四月一日傍晚七点零六分,哥哥张国荣离开了我们。  

二零零一年八月十九日下午三时许四时,哥哥担任港九狗会第五十八及五十九届全犬种冠军展的嘉宾。在大哥邓光荣先生的帮忙下,本刊成为全场唯一可与哥哥做独家访问的传媒。访问中,哥哥不仅大谈了他的养狗之道,更从语言间处处流露他是一位切切实实的爱狗人。而以下则是当日访问中哥哥的真心话节录。
 

 

 

“我在加拿大居住时,养了一只长毛牧羊狗,那里天气较冻,牠会比较舒服一点,而後来我回港,亦想将它带回来,但考虑过香港天气太热,要剃毛好阴公,所以就将佢送给朋友。”  

“大约在四年前开始我养了一只狼狗,它叫Bingo。选择狼狗是因为我喜欢这种狗忠心的性格,好保护主人。” 

“我在加拿大生活时,曾学过train狗,我钟意自己一手一脚去教,Bingo晤会识做很复杂的动作,但当我发施号令时,它会识听。”  

“我唔想训练到只狗好驯,因为狗始终有自己的性格,佢会develop自己的character,我觉得最紧要俾佢感觉到你的爱心。我唔想听到话个trainer训练得只狗好好,因为背後只狗会好辛苦,打佢我会唔舍得。”  

“我地要用一些好好的方法去教,我睇书话,狗其实系惊声多过惊痛,所以当佢曳时,可以用Magazine去拍打家俬,它便会害怕,反而如果将只狗打得好痛,佢就会嬲你。”  

“我唔会觉得养狗烦。每日早上工人放狗,而晚上我就自己放。”  

“狗系好聪明的动物,系Man Best Friend,即系人类最佳伴侣,其实最重要系俾佢感觉你嘅爱心,佢会知架!锡佢同打佢、闹佢,佢会分辨得好清楚,佢亦会知道自己做错野,那时你闹佢佢会知点解,所以千祈唔好无厘头咁闹佢,佢会唔明。

后记

哥哥选择了从二十四楼一跃而下来结束自己的生命,自小已喜欢哥哥的我除感到伤痛外,心里还有万千问号,如斯俊朗、才华洋溢、集万千宠爱於一身的人怎会走上这绝路呢?

但随着连日来报章、杂志的报道,我的心亦开始慌起来,因为就哥哥的死,传媒有众多揣测,有说他与好友感情生变,有说他拍戏撞邪,有说他跟大陆商人关系暧昧,亦有说导演梦未能达成,甚至说他身患顽疾…

当传媒们纷纷作出种种传言时,这股力量确实可畏,甚至会将一个在众人眼中皆认同是完美的人逼上绝路。试易地而处想想,纵使爱情、事业、家庭及金钱上都已满足,但每每走上街上时都有可能被跟踪偷拍,甚至经常被传出一些连当事人亦不知情的内幕消息时,即使是一个身心健康的人,亦会受到困扰,而三、四十年代红星阮玲玉便是在人言可畏下了却自己的生命。

希望哥哥安安静静的生活在另一个国度里,不再受到骚扰。
 

(下文摘自2001年《犬月刊》)

哥哥谈他的最佳伴侣——幸福的Bingo

大家千祈唔好心邪!以为最佳伴侣系指阿乜生,其实哥哥所谈的系佢只狼狗“Bingo”,因为一向以来哥哥都认为狗系人类的最佳伴侣,所以“Bingo”咪即系哥哥的最佳伴侣啰!呐!无呃你地架!

虽然哥哥系超级大红人,但就对我地的同事非常友善,一点明星架子都无,唔似得有的小明星咁鼻大大,而当同哥哥讲狗经得时候,更加系可以感受到佢系百分之一百的爱狗同道中人,系真真正正的爱,绝对唔系玩玩吓果一种,所以边位习惯用“玩狗”喱个字眼去代替“养狗”的人兄,愿你决定由喱一刻开始受哥哥感染,拒绝再玩狗,而系用爱去养狗喇!

当年情

言归正传,熟悉宠物喱行的朋友一定知道宜家最大热的狗,系金毛寻回犬、史纳莎之类,但哥哥就只会对狼狗同牧羊狗这两种大狗讲为你钟情,因为这两种狗都系哥哥这些年来所养的狗种。

当中的牧羊狗系哥哥在加拿大住果时养的,虽然佢系哥哥的可人儿,亦同哥哥在加拿大共同度过唔少刻骨铭心的快乐时光,但后来哥哥因为要返香港住,而香港春夏秋冬的天气都同加拿大唔同,尤其系夏天时又湿又热,如果夹硬将只牧羊狗带返香港的话,就一定要同佢剃毛,由于哥哥向来崇尚由上帝创造的自然美,唔想将只牧羊狗原本靓到好似同枕头一样软绵绵的披毛剃光,所以哥哥喱位有心人惟有在爱的抉择下忍痛同只牧羊狗分手,将佢送咗俾朋友。

(笔者按:唉!牧羊狗你之所以同哥哥缘尽于加拿大,相信都系只怪你过分美丽,令哥哥唔忍心将你的美丽破坏,相信哥哥咁有情义,无论系呷过午后红茶,抑或系梦到内河时,都一定会想你,甚至系会有A Thousand Dream of You添!你一定要洁身自爱,唔好红颜白发,兼且要小心保重身体,唔好发烧,相信哥哥以后有时间一定会返回加拿大探你,到时候就可以同你深情相拥架喇!)

爱心

回想起加拿大同爱犬的当年情,哥哥意犹未尽地表示曾在当地学过train狗呢!

“我中意一手一脚去教,当我发号施令时,佢地都会识听,但我唔钟意训练到佢地纯到乜都识做,因为我觉得狗始终都有佢自己的性格。”所以哥哥只会教佢的狗做的好似stand up、sit等等的基本动作,绝对唔会训练到佢地好似俾把无形锁扣锁住咁!

“其实养狗最紧要有爱心,我唔想听到有的人话果个trainer好好,教到只狗好多野,因为背后只狗可能受到好多体罚,我会唔舍得!所以我觉得应该用一点好的方法去train,例如当佢顽皮的时候,可以用点薄的magazine去拍打家私之类的东西。因为狗其实系惊声多过惊痛,除非系打得佢好痛,但咁打法佢会嬲,所以唔应该用体罚。”

(笔者按:养狗其实同养细路差唔多,如果以为打打闹闹就能够令个细路变乖,就只系妄想,因为终有一日个细路会唔再受控,然后离家出走,烈火边缘之中,而身为家长的就只会担心得无心睡眠,而养狗都系一样,所以念住用体罚就能够将只狗教好,除非有Miracle,唔知点解?咪即系奇迹啰!)

左右手

哥哥返到嚟香港之后,系没有爱犬相伴之下,尤其系每个黑色午夜就会倍感寂寞有害,为咗唔想梦死醉生咁做怨男,于是哥哥喱位寂寞猎人就在四年前开始养咗一只狼狗,而喱只狼狗就系“Bingo”喇!“我钟意狼狗的性格比较忠心,护主心强,好听话,唔顽皮,我觉得狗最紧要系识得保护主人,我本身住house,当一有人行过我个围栏,‘Bingo’就会吠。”咁睇嚟,“Bingo”咪简直系哥哥的左右手啰!?

哥哥虽然贵为超级巨星,但平日佢亦会同一般狗主一样带“Bingo”去散步,享受一下放狗乐。

“‘Bingo’每日早晚都会出去散步,朝早由工人带,夜晚就由我自己放。”

(笔者按:唔知我有无咁好彩撞到哥哥放狗呢?如果可以见到哥哥放狗,就算要我做隐身人去偷望都无所谓架!唔知我个睇法会有谁共鸣呢?)

“我觉得狗除咗系聪明的动物之外,更加系Man Best Friends,即系人类最佳伴侣,所以一定要令佢感到你的爱心,佢会分得好清楚系锡佢定闹佢,所以当佢顽皮时,一定要令佢知道点解要闹佢,绝对唔可以无喱头咁闹佢。”

(笔者按:如果狗识讲野的话,相信每只狗都会同主人讲:“Love me more !”而且仲系Tonight and Forever,兼且今生今世都会希望能够陪你倒数人生添!)

风继续吹

由于哥哥钟意狼狗同牧羊狗,所以我地亦特别安排咗喱两只狗同佢合照。虽然喱两只狗只系好似路过蜻蜓咁初次同哥哥见面,但佢地已经情难自控同哥哥眉来眼去,摇头摆尾之余,只牧羊狗仲坐在哥哥大腿上面影相添!但由于场内实在太多摄记,闪光灯不断追住哥哥同只狼狗闪呀闪,令只狼狗开始有点惊,哥哥察觉到佢开始唔得心跳呼吸正常的时候,就同在场的记者讲话影够了,仲叫记者请勿越轨以免吓到只狼狗添!由此可知道哥哥真系非常非常爱狗,在娱乐圈中唔知还有谁会比佢更爱狗呢?希望哥哥对狗狗的爱心风继续吹遍每一个角落,令所有狗都能够身边有人去爱。

最新评论   进入详细评论页 >>
随机推荐